Arrincaron aló polo outono, estiveron paradas durante varios meses arredor do nadal, pero finalmente poderán estar operativas para unha das temporadas altas do turismo na comarca. 

A rotonda da DP-5201, que une a cabeceira municipal con Touriñán e que serve de acceso ao Parador de Lourido, estará operativa na Semana Santa.

Anunciouno o presidente da Deputación, Valentín González Formoso, que esta mañá comprobou “in situ” o resultado dos traballos xunto ao alcalde, Iago Toba, e á deputada de Infraestruturas Viarias e Obras, Mónica Rodríguez. A execución do proxecto, adxudicada por 404.295,82 euros, incluíu a construción dunha rotonda para regular o tráfico na intersección coa estrada municipal que comunica os lugares de Serantes, Cartel e O Vilariño, nas inmediacións do propio Parador. Con ela dáselle solución ao problema de seguridade viaria que existía no antigo cruce, en forma de T.

Proximamente, completarase tamén a instalación de iluminación na rotonda.